مشتاقلك يا بِكْرِ أحلامى

فى هذا المكان وُلِدتُ وتربيتُ وعشتُ أجمل ذكرياتى ومنه خرجتُ إلى بيت الزوجية - أسيوط 

مشتاقلك يا بِكْرِ أحلامى
مشتاقلك يا أحلى أيامى

مشتاق لكل ألعابى

ولهوى ويَّا أصحابى

ولعبى ويَّا جيرانى

معَ أهلى و خِلاَّنى

مشتاق للِّعْب ع السِّلِّم ..

من غير ما اتعب أو أتألِّم

مشتاق ل لعب الصيَّادة

و معايا سالى و حمادة

مشتاق للِّعب ف الشارع

و أروح أصلى ف الجامع

مشتاق لتقسيمة الكورة
وقبل ما تخلص الفورة .. 

أسمع صوت أمى ب تندهلى

كفاية يا محمد اطلعلى

وأقول لك يا أمى سيبينى

شوية كمان و خلِّينى

مشتاق ل جوّ رمضان

ومسحراتى أيام زمان

مشتاق نعلَّق الزينة

فى شارعنا وف كل المدينة

مشتاق ل لمة عمارتنا

ب نزور بعض ف بيوتنا

ياااه .. مشتاقلك يا لمة العيلة
إيد واحدة .. ب نشيل مع بعضنا الشِّيلة

مشتاق لسهرة مع اصحابى

وقعدة ويَّا أحبابى

مشتاق لقعدة فى الجنينة
و الفجر ب يأذن علينا

مشتاق ل نومتنا ع النجيلة
ب نعد نجوم السما كل ليلة

آآآه .. مشتاق لأيامى الخوالى

من غير ما ينشغل بالى

مشتاق ل صوت القطر ب يصفر

و صوت الأذان .. الله أكبر

مشتاق أصحى الصبح من بدرى 

أشوف شروق الشمس من بدرى

و استنى أشوفها وهى ب تغيب
أودعها مستنى تعود عن قريب 

يا شارعنا .. رغم إنى سايبك من سنين
لكن دايماً فى قلبى ليك حنين

يوماتى لما با أزور أبويا و أمى
با انسى كل أحزانى و يزول كل همى

با أحس فيك بسعادة زمان
وإنه رجعلى من تانى الأمان

ما أنت اللى كنت شاهد على يوم ميلادى
والناس فرحانة و شايلانى ع الأيادى

 وأنت اللى شهدت فرحى ونجاحى
وكتير من أيام تعبى و كفاحى

لما أحب أفكر .. آجى أبص لأشجارك
و اسرح ما بينهم وكأن أفكارى أفكارك

  ورغم ان شغل الحياة عنك مانعنا
لكنى لسه .. با اشتاقلك يا شارعنا

مشتاقلك يا أحلى أيامى
مشتاقلك يا بِكْرِ أحلامى